నేను ఇండియాకు రాలేను.. బాంబే హైకోర్టుకు విజయ్ మాల్యా వివరణ

భారతదేశానికి తిరిగి రావడం ప్రస్తుతం సాధ్యం కాదని పరారీలో ఉన్న వ్యాపారవేత్త విజయ్ మాల్యా బాంబే హైకోర్టుకు తెలియజేశారు. తన వద్ద ప్రస్తుతం చెల్లుబాటు అయ్యే పాస్‌పోర్ట్ లేదని, అంతేకాకుండా యునైటెడ్ కింగ్‌డమ్ను విడిచి వెళ్లకుండా అక్కడి కోర్టులు విధించిన ఆంక్షలు ఉన్నాయని ఆయన తరఫు న్యాయవాది అమిత్ దేశాయ్ కోర్టుకు వివరించారు. ఈ నేపథ్యంలో భారత్‌కు రావడం తన నియంత్రణలో లేదని మాల్యా చెప్పినట్లు న్యాయవాది తెలిపారు.

ఇటీవల మాల్యా దాఖలు చేసిన పిటిషన్లపై విచారణ సందర్భంగా, ఆయన స్వయంగా కోర్టు ఎదుట హాజరు కావాల్సిందేనని ధర్మాసనం స్పష్టం చేసిన విషయం తెలిసిందే. భారత్‌కు తిరిగి రాకపోతే ఆయన పిటిషన్లను పరిశీలించబోమని ప్రధాన న్యాయమూర్తి నేతృత్వంలోని బెంచ్ గత వారం వ్యాఖ్యానించడంతో ఈ వివరణ సమర్పించినట్లు సమాచారం. ప్రస్తుతం తనపై ఉన్న కేసులు, చట్టపరమైన పరిస్థితుల కారణంగా దేశానికి రావడం సాధ్యం కావడం లేదని మాల్యా వాదిస్తున్నారు.

బ్యాంకులకు వేల కోట్ల రూపాయల బకాయిల కేసులో ఆరోపణలు ఎదుర్కొంటున్న మాల్యా విదేశాల్లోనే ఉండటం, ఆయనను భారత్‌కు తీసుకురావడానికి జరుగుతున్న చట్టపరమైన ప్రక్రియలు కొనసాగుతుండటం తెలిసిందే. ఈ కేసులో తదుపరి విచారణ ఎప్పుడు జరుగుతుందనే దానిపై కోర్టు నిర్ణయం తీసుకునే అవకాశం ఉంది.