రీల్స్ కోసం పసిబిడ్డ ప్రాణాలతో ఆట.. వైరల్ వీడియోపై ఆగ్రహం

సోషల్ మీడియా రీల్స్ కోసం కొందరు ఎంతవరకైనా దిగజారుతున్నారనే ఉదంతం తాజాగా వెలుగులోకి వచ్చింది. రాజస్థాన్లో ఓ వ్యక్తి పబ్లిసిటీ కోసం పసిబిడ్డ ప్రాణాలతో చెలగాటమాడిన ఘటన షాకింగ్‌గా మారింది. చిన్నారికి బీర్ తాగిస్తూ, సిగరెట్ నోటికి అందిస్తున్న వీడియో ప్రస్తుతం సోషల్ మీడియాలో వైరల్ అవుతోంది. ఈ దృశ్యాలు చూసిన నెటిజన్లు తీవ్ర ఆగ్రహం వ్యక్తం చేస్తున్నారు.

వీడియోలో కనిపించిన వ్యక్తి చిన్నారిని ఒడిలో పెట్టుకుని బలవంతంగా బీర్ తాగించే ప్రయత్నం చేయడం, సిగరెట్ దగ్గర పెట్టడం స్పష్టంగా కనిపించడంతో ప్రజలు ఆందోళన చెందుతున్నారు. పిల్లల భద్రతను పూర్తిగా పట్టించుకోకుండా ఇలా వ్యవహరించడం అమానుషమని వ్యాఖ్యలు చేస్తున్నారు. ఇది కేవలం వినోదం పేరుతో చేసిన చర్య కాదని, చిన్నారి ప్రాణాలకు ముప్పు కలిగించే ప్రమాదకర ప్రవర్తన అని నిపుణులు కూడా అభిప్రాయపడుతున్నారు.

బైక్ నంబర్ ఆధారంగా ఆ వ్యక్తిని గుర్తించి కఠిన చర్యలు తీసుకోవాలని ప్రజలు భారత్ పోలీసులను కోరుతున్నారు. సోషల్ మీడియా కోసం ఇలాంటి బాధ్యతారహిత చర్యలు చేసే వారిపై చట్టపరమైన చర్యలు తప్పనిసరి అని నెటిజన్లు డిమాండ్ చేస్తున్నారు.