ఆపరేషన్ సిందూర్‌పై సినిమా.. మరో సంచలనానికి సిద్ధమవుతున్న వివేక్ అగ్నిహోత్రి

దేశభక్తి నేపథ్య కథలతో ప్రత్యేక గుర్తింపు తెచ్చుకున్న దర్శకుడు వివేక్ అగ్నిహోత్రి మరో సంచలన ప్రాజెక్ట్‌కు సిద్ధమవుతున్నారని బాలీవుడ్ వర్గాల్లో చర్చ జరుగుతోంది. ఇప్పటికే ఆయన తెరకెక్కించిన ది కాశ్మీర్ ఫైల్స్, ది వ్యాక్సిన్ వార్, అలాగే ప్రకటించిన ది బెంగాల్ ఫైల్స్ సినిమాలు దేశవ్యాప్తంగా చర్చనీయాంశంగా మారిన విషయం తెలిసిందే. ఇప్పుడు “ఆపరేషన్ సిందూర్” నేపథ్యంలో సినిమా తీయాలనే ఆలోచనలో ఆయన ఉన్నట్లు సమాచారం.

ఈ ప్రాజెక్ట్ కోసం ప్రముఖ నిర్మాత భూషణ్ కుమార్తో చర్చలు పూర్తయ్యాయని సినీ వర్గాలు చెబుతున్నాయి. కథలో భాగంగా పాకిస్థాన్‌ మరియు పీవోకే ప్రాంతాల్లో ఉన్న ఉగ్రవాద స్థావరాలపై భారత సైన్యం చేపట్టిన సర్జికల్ స్ట్రైక్స్‌, వ్యూహాత్మక చర్యలు, సైనికుల ధైర్యసాహసాలను ప్రధానంగా చూపించే అవకాశముందని తెలుస్తోంది. నిజ ఘటనల ఆధారంగా భావోద్వేగభరిత కథను రూపొందించేందుకు టీమ్ పరిశోధనలు ప్రారంభించినట్లు కూడా వార్తలు వినిపిస్తున్నాయి.

అయితే ఈ సినిమాలో హీరోగా ఎవరు నటిస్తారు? ఇతర ముఖ్య పాత్రల్లో ఎవరుంటారు? షూటింగ్ ఎప్పుడు ప్రారంభమవుతుంది? వంటి విషయాలపై ఇంకా అధికారిక ప్రకటన రావాల్సి ఉంది. దేశభక్తి అంశాలపై సినిమాలు తెరకెక్కించడంలో తనకంటూ ప్రత్యేక శైలిని ఏర్పరచుకున్న వివేక్ అగ్నిహోత్రి ఈ ప్రాజెక్ట్‌తో మరోసారి చర్చనీయాంశం అవుతారా అన్న ఆసక్తి ప్రేక్షకుల్లో నెలకొంది.