H-1B వీసా ఫీజు లక్ష డాలర్లకు పెంపు – భారతీయ ఐటీ నిపుణులకు అమెరికాలో కొత్త సవాళ్లు

అమెరికా అధ్యక్షుడు డొనాల్డ్ ట్రంప్ హెచ్-1బీ వీసా ఫీజును లక్ష డాలర్లకు పెంచుతూ తీసుకున్న నిర్ణయం ఇప్పుడు చర్చనీయాంశంగా మారింది. ఈ చర్య అనేక అంతర్జాతీయ ఉద్యోగులపై తీవ్ర ప్రభావం చూపనుందని విశ్లేషకులు భావిస్తున్నారు. ట్రంప్ ప్రకటన వెలువడిన వెంటనే మైక్రోసాఫ్ట్, మెటా వంటి ప్రముఖ అమెరికన్ టెక్ కంపెనీలు తమ ఉద్యోగులకు మెయిల్‌ పంపి వెంటనే యూఎస్‌కి బయలుదేరాలని సూచించాయి. ఫలితంగా, అమెరికా వెళ్లే విమానాల టిక్కెట్ల ధరలు ఆకాశాన్నంటుతున్నాయి. ఈ పరిస్థితిని ఆసరాగా తీసుకుని ఎయిర్‌లైన్స్ కంపెనీలు భారీగా లాభాలు ఆర్జిస్తున్నట్లు తెలుస్తోంది. ఇదిలా ఉండగా, వీసా ఫీజు విషయంలో మరో సందేహం తలెత్తుతోంది — ఈ ఫీజు ప్రతి ఏడాది చెల్లించాలా? లేక ఒక్కసారి చెల్లిస్తే సరిపోతుందా? తాజాగా ఈ అంశంపై వైట్‌హౌస్ స్పందించింది.

శ్వేతసౌధం ప్రెస్‌ సెక్రటరీ కరోలిన్‌ లెవిట్టి ఎక్స్‌లో దీనిపై పోస్ట్ పెట్టారు. హెచ్-1బీ వీసా (H-1B Visa)పై విధించిన లక్ష డాలర్లు వార్షిక ఫీజు కాదని స్పష్టం చేశారు. కేవలం దరఖాస్తు సమయంలో చెల్లించాల్సిన వన్‌టైమ్‌ ఫీజు మాత్రమేనని ఆమె పేర్కొన్నారు. అంతేకాదు అలాగే, ఇప్పటికే హెచ్-1బీ వీసా పొందినవారు కానీ ప్రస్తుతం అమెరికా వెలుపల ఉన్నవారు ఈ ఫీజు పెంపుతో కలవలసిన ఆందోళన ఏమాత్రం అవసరం లేదని లెవిట్టి స్పష్టం చేశారు. వారికి ఈ నూతన రుసుము వర్తించదని, వారు అమెరికా నుంచి ఇతర దేశాలకు వెళ్లి తిరిగి రావడంలో ఎలాంటి ఇబ్బంది ఉండబోదని తెలిపారు. కొత్తగా అమలులోకి వచ్చిన నిబంధనలు ఇప్పటి వీసా కలిగిన వారిపై ప్రభావం చూపవని ఆమె స్పష్టం చేశారు.   

కొత్తగా హెచ్-1బీ వీసాదరఖాస్తు చేసేవారికి మాత్రమే ఈ వన్‌టైమ్ లక్ష డాలర్ల ఫీజు వర్తిస్తుందని శ్వేతసౌధం ప్రెస్‌ సెక్రటరీ కరోలిన్ లెవిట్టి స్పష్టంగా పేర్కొన్నారు. ప్రస్తుతం హెచ్-1బీ వీసా కలిగినవారికి లేదా వీసా రెన్యూవల్ కోసం దరఖాస్తు చేసేవారికి ఈ చెల్లింపు అవసరం లేదని ఆమె తెలిపారు.

అమెరికా అధ్యక్షుడు ట్రంప్ ప్రకటించిన ఈ కొత్త వీసా ఫీజు సెప్టెంబరు 21 అర్ధరాత్రి (అమెరికా కాలమానం ప్రకారం) నుంచి అధికారికంగా అమల్లోకి వచ్చింది. దాంతో, సెప్టెంబరు 21కు ముందు హెచ్-1బీ వీసా కోసం పిటిషన్ దాఖలు చేసిన వారికి ఈ పెరిగిన ఫీజు వర్తించదు. సాధారణంగా కంపెనీలు తమ ఉద్యోగుల హెచ్-1బీ వీసా కోసం చేసే అధికారిక దరఖాస్తును "పిటిషన్"గా పరిగణిస్తారు.

అదే సమయంలో, హెచ్-1బీ వీసా కలిగిన వ్యక్తులు స్వేచ్ఛగా అమెరికాకు వచ్చి వెళ్లొచ్చని అమెరికా పౌరసత్వ మరియు వలస వ్యవహారాల విభాగం (USCIS) డైరెక్టర్ జోసఫ్ ఎడ్ తెలిపారు. ఆయన విడుదల చేసిన తాజా మార్గదర్శకాల్లో ఈ విషయాన్ని స్పష్టం చేశారు. అలాగే, సంబంధిత అధికారులు ఈ మార్గదర్శకాలను అనుసరించి చర్యలు తీసుకోవాలని సూచించారు.

అమెరికాలో కొన్ని టెక్ కంపెనీలు H-1B వీసా వ్యవస్థను తప్పుగా వినియోగిస్తున్నట్లు ట్రంప్ ప్రభుత్వం ఆరోపిస్తోంది. విదేశాల నుంచి తక్కువ జీతాలపై ఉద్యోగులను తీసుకురావడం ద్వారా స్థానిక అమెరికన్‌ల ఉద్యోగ అవకాశాలను హరించేస్తున్నాయని పెద్దఎత్తున విమర్శలు వచ్చాయి. చాలాసార్లు H-1B వీసా పొందే అభ్యర్థులు తక్కువ పారితోషికంతో పనిచేయడానికి అంగీకరిస్తున్నారని అధికార వర్గాలు అభిప్రాయపడుతున్నాయి. ఈ నేపథ్యంలో లాటరీ విధానాన్ని తొలగించి, వీసా ఫీజును గణనీయంగా పెంచిన తీరు ప్రత్యేకంగా గమనించదగ్గది.