దావోస్ వేదికగా ఏపీకి బిగ్ బ్రేక్ ఎలా వచ్చింది? లోకేశ్ సంచలన వ్యాఖ్యలు

* సీఎం చంద్రబాబు, నారా లోకేష్ దావోస్ కార్యక్రమంలో పాల్గొన్నారు. 

* ఏపీ పెట్టుబడుల కోసమే అని నారా లోకేష్ 

* 23.5 లక్షల కోట్లు పెట్టుబడులు వచ్చాయి అని వెల్లడి 

* పెట్టుబడులు వర్షం ఆంధ్రప్రదేశ్ కి కురువబోతున్నాయా? 

* పూర్తి వివరాల్లోనికి వెళ్తే : 

 fourth line news : ఆంధ్రప్రదేశ్ రాష్ట్రానికి భారీ స్థాయిలో పెట్టుబడులు రావడానికి ముఖ్యమంత్రి చంద్రబాబు నాయుడే ప్రధాన కారణమని మంత్రి నారా లోకేశ్ స్పష్టం చేశారు. స్విట్జర్లాండ్‌లోని దావోస్ వేదికగా జరిగిన వరల్డ్ ఎకనామిక్ ఫోరంలో పాల్గొన్న ఆయన, రాష్ట్ర అభివృద్ధిపై కీలక వ్యాఖ్యలు చేశారు. గత ఏడాదిన్నర కాలంలోనే ఏపీకి రూ.23.5 లక్షల కోట్ల పెట్టుబడులు వచ్చాయని తెలిపారు. ఈ పెట్టుబడుల వల్ల దాదాపు 16 లక్షల మంది యువతకు ఉద్యోగ అవకాశాలు కలగనున్నాయని చెప్పారు.

రాష్ట్రాన్ని ఆధునిక దిశలో తీసుకెళ్లేందుకు సీఎం చంద్రబాబు నాయుడు స్పష్టమైన విజన్‌తో ముందుకెళ్తున్నారని లోకేశ్ పేర్కొన్నారు. అభివృద్ధి, ఐటీ, ఎలక్ట్రానిక్స్, గ్రీన్ ఎనర్జీ, క్వాంటమ్ టెక్నాలజీ వంటి రంగాల్లో ఏపీని ముందుకు నడిపిస్తున్నారని అన్నారు. ఈ విధానాలే పారిశ్రామికవేత్తలను ఆకర్షిస్తున్నాయని చెప్పారు. దేశం నుంచే కాదు, విదేశాల నుంచి కూడా పెట్టుబడిదారులు ఆంధ్రప్రదేశ్ వైపు చూస్తున్నారంటే దానికి కారణం చంద్రబాబు నాయుడేనని స్పష్టం చేశారు.

దావోస్‌లో జరిగిన సమావేశాల్లో అనేక అంతర్జాతీయ కంపెనీల ప్రతినిధులతో చర్చలు జరిగాయని లోకేశ్ తెలిపారు. రాష్ట్రంలో పెట్టుబడులకు అనుకూలమైన వాతావరణం, స్పష్టమైన పాలసీలు, వేగవంతమైన అనుమతులు ఉండటమే పెట్టుబడిదారుల విశ్వాసాన్ని పెంచుతోందన్నారు. “బిజినెస్ చేయడానికి ఏపీ బెస్ట్ డెస్టినేషన్‌గా మారుతోంది” అని పలువురు పారిశ్రామికవేత్తలు చెప్పిన విషయాన్ని కూడా ఆయన గుర్తు చేశారు.

టీడీపీ ప్రభుత్వం అధికారంలోకి వచ్చిన తర్వాత పెట్టుబడుల విషయంలో ఏపీ వేగం పెరిగిందని లోకేశ్ చెప్పారు. ఒక్క సంతకంతో ఫైళ్లు కదిలే పరిస్థితి తీసుకొచ్చామని తెలిపారు. యువతకు ఉద్యోగాలు కల్పించడమే ప్రభుత్వ ప్రధాన లక్ష్యమని స్పష్టం చేశారు. పరిశ్రమలు వస్తే కేవలం ఉద్యోగాలే కాకుండా, రాష్ట్రానికి ఆదాయం పెరుగుతుందని, పల్లె ప్రాంతాల వరకు అభివృద్ధి చేరుతుందని అన్నారు.

భవిష్యత్తులో ఆంధ్రప్రదేశ్‌ను టెక్నాలజీ హబ్‌గా తీర్చిదిద్దాలన్నదే సీఎం చంద్రబాబు నాయుడి లక్ష్యమని లోకేశ్ తెలిపారు. ఆ దిశగా ప్రభుత్వం వేగంగా అడుగులు వేస్తోందని, వచ్చే రోజుల్లో మరిన్ని భారీ పెట్టుబడులు రాష్ట్రానికి రానున్నాయని ధీమా వ్యక్తం చేశారు.