పిల్లలు వద్దు… బొమ్మలే ముద్దు అంటున్న చైనా యువతులు

జననాల రేటు గణనీయంగా తగ్గిపోతున్న చైనాలో కొత్త సామాజిక ధోరణి కనిపిస్తోంది. అక్కడి జెనీ (Gen Z) మహిళల్లో కొందరు పిల్లలను కనడం, పెంచడం కంటే బొమ్మలను పెంచుకోవడానికే ఆసక్తి చూపుతున్నారు. తమకు నచ్చిన విధంగా ప్రత్యేకంగా డిజైన్ చేయించిన రియలిస్టిక్ డాల్స్‌ను కొనుగోలు చేసి, వాటినే తమ బిడ్డలా చూసుకుంటూ భావోద్వేగ అనుబంధాన్ని పెంచుకుంటున్నారు. ఇలా చేయడం వల్ల మానసిక ప్రశాంతత లభిస్తుందని, ఒత్తిడి తగ్గుతుందని వారు భావిస్తున్నారు.

పిల్లలను జన్మనివ్వడం నుంచి 18 సంవత్సరాల వరకు పెంచడానికి సగటున రెండున్నర లక్షల డాలర్లకు పైగా ఖర్చవుతుందని అంచనాలు చెబుతున్నాయి. అదే సమయంలో ఒక కస్టమ్ బొమ్మను 200 నుంచి 800 డాలర్ల మధ్యలోనే పొందవచ్చని యువత చెబుతోంది. పెళ్లి, కుటుంబ బాధ్యతలు, ఉద్యోగ ఒత్తిడి మధ్య సమతుల్యత సాధించడం కష్టంగా మారిన నేపథ్యంలో ఈ ప్రత్యామ్నాయం తమకు సులభంగా అనిపిస్తోందని వారు అభిప్రాయపడుతున్నారు.

ఇంకా ముఖ్యంగా, బొమ్మలను పెంచుకోవడం వల్ల కెరీర్‌లో ఎలాంటి అంతరాయం ఉండదని, వ్యక్తిగత స్వేచ్ఛ కూడా కోల్పోనవసరం లేదని యువత పేర్కొంటోంది. అయితే నిపుణులు మాత్రం ఇది తాత్కాలిక భావోద్వేగ పరిష్కారం మాత్రమేనని, సమాజంలో కుటుంబ నిర్మాణంపై దీర్ఘకాల ప్రభావం పడే అవకాశముందని హెచ్చరిస్తున్నారు.