బెంగళూరులో దుకాణంలో చీరల దొంగతనం కలకలం: నడిరోడ్డుపై మహిళపై దాడి – యజమానికి జైలు

Main headlines ;

• బెంగళూరులో భారీ చీరల దొంగతనం:
  ఓ మహిళ ‘మాయా సిల్క్స్ శారీస్’ దుకాణం నుంచి రూ.91,500 విలువైన 61 చీరలు దొంగిలించింది.

• సీసీటీవీ ఫుటేజ్ ఆధారంగా కేసు నమోదు:
  దొంగతనాన్ని సీసీటీవీ కెమెరాల్లో గమనించిన దుకాణ యజమాని పోలీసులకు ఫిర్యాదు చేసి కేసు నమోదు చేయించారు.

• మరుసటి రోజు మహిళ మళ్లీ దుకాణానికి రాగానే పట్టివేత:
  అదే దుకాణానికి తిరిగి వచ్చిన మహిళను యజమాని, సిబ్బంది పట్టుకున్నారు.

• నడిరోడ్డుపై మహిళపై దాడి – వీడియో వైరల్:
  ఆమెను రోడ్డుపైకి ఈడ్చుకొని, కాళ్లతో తన్ని, దుర్భాషలాడిన దృశ్యాలు వైరల్ అయ్యాయి.

• సామాజిక సంఘాల నుండి తీవ్ర నిరసన:
  ఘటనపై పౌర సమాజం, కన్నడ సంఘాలు ఆగ్రహం వ్యక్తం చేస్తూ పోలీసులపై ఒత్తిడి తెచ్చాయి.

• మహిళా అరెస్ట్ – దాడికి పాల్పడిన యజమానిని కూడా అరెస్ట్:
  దొంగతనం కేసులో మహిళను, దాడి కేసులో దుకాణ యజమాని, సిబ్బందిని అరెస్ట్ చేశారు.

పూర్తి వివరాల్లోనికి వస్తే ; 

చీరలు దొంగిలించిందని అనుమానంతో మహిళపై దాడి – వీడియో వైరల్, దాడి చేసినవారే జైలుకి

బెంగళూరులో ఓ మహిళపై దుకాణ యజమాని మరియు అతని సిబ్బంది రోడ్డుపై మధ్యలోనే దాడికి పాల్పడ్డారు. చీరలు దొంగిలించిందని అనుమానంతో ఆమెను అమానుషంగా కొట్టారు. చట్టాన్ని చేతుల్లోకి తీసుకున్న వీరి చర్య చివరికి వారికే పెనుప్రమాదమైందీ. ఈ సంఘటనకు సంబంధించిన వీడియో సోషల్ మీడియాలో తీవ్రంగా వైరల్ అవ్వడంతో తీవ్ర విమర్శలు వెల్లువెత్తాయి. పోలీసుల జోక్యంతో దాడి చేసిన వారిని అరెస్టు చేసి కస్టడీకి తీసుకున్నారు. 

ఈ నెల 20న బెంగళూరులోని అవెన్యూ రోడ్డులో ఉన్న 'మాయా సిల్క్స్ శారీస్' అనే ప్రఖ్యాత వస్త్ర దుకాణంలోకి ఓ మహిళ ప్రవేశించింది. దుకాణదారుల కళ్లుగప్పి సుమారు  రూ.91,500 విలువ చేసే 61 చీరల బట్ట కట్టను ఆమె చాకచక్యంగా ఎత్తుకుపోయింది. ఈ మొత్తం ఘటన అక్కడ ఏర్పాటు చేసిన సీసీటీవీ కెమెరాల్లో స్పష్టంగా రికార్డయింది. దాంతో, దుకాణ యజమాని వెంటనే సిటీ మార్కెట్ పోలీస్‌స్టేషన్‌కు వెళ్లి ఫిర్యాదు చేయడంతో, పోలీసులు కేసు నమోదు చేసి విచారణ ప్రారంభించారు.

అయితే, వెంటనే మరుసటి రోజే ఆ మహిళ మళ్లీ అదే దుకాణం వద్ద కనిపించింది. దాంతో, దుకాణ యజమాని మరియు ఆయన సిబ్బంది ఆమెను పట్టుకుని నిలదీశారు.

దొంగిలించిన చీరలపై వివరణ కోరుతూ, ఆమెను రోడ్డుపైకి లాక్కొచ్చి తీవ్రంగా దాడి చేశారు. ఆమెను కాళ్లతో తన్నుతూ, దుర్భాషలతో వేధించారు. ఈ దృశ్యాలను అక్కడ ఉన్న కొందరు వీడియో తీసి సోషల్ మీడియాలో పోస్ట్ చేయడంతో ఆ క్లిప్ వేగంగా వైరల్ అయింది.

ఈ వీడియో బయటకు వచ్చిన వెంటనే, కన్నడ సంఘాలు మరియు పౌరసంఘాలు తీవ్రంగా స్పందించాయి. దొంగతనం చేసిన అనుమానం ఉంటే, పోలీసులకు అప్పగించాలి కానీ ఇలా నడిరోడ్డుపై మహిళపై అతి దారుణంగా దాడి చేయడం ఏమిటని ప్రశ్నించాయి.

ఘటనపై ప్రజల నుంచి తీవ్ర ఆందోళనలు వ్యక్తమవుతుండటంతో, పోలీసులు తక్షణం చర్యలు చేపట్టారు. మహిళను అదుపులోకి తీసుకుని, ఆమె వద్ద నుంచి చీరల కట్టను స్వాధీనం చేసుకున్నారు.

అటు, చట్టాన్ని చేతుల్లోకి తీసుకొని దాడికి పాల్పడిన దుకాణ యజమాని మరియు అతని సిబ్బందిని కూడా అరెస్ట్ చేశారు. వారిపై సంబంధిత నేరాల కింద కేసులు నమోదు చేసి, విచారణ మొదలుపెట్టారు.