భారతదేశం అంటే మామూలుగా ఉండదు, సుంకాలు తగ్గిస్తాను ! ట్రంప్.

1. అమెరికా ట్రంప్ ప్రభుత్వం దేశంలో పెరుగుతున్న ధరలను నియంత్రించడానికి అనేక ఆహార పదార్థాల దిగుమతులపై సుంకాలను తగ్గించే నిర్ణయం తీసుకుంది.

2. ఈ సుంకాల తగ్గింపు వల్ల భారత్‌ నుంచి వెళ్లే మామిడి, దానిమ్మ, టీ వంటి వ్యవసాయ ఉత్పత్తుల ఎగుమతులకు లాభం కలిగే అవకాశం ఉంది.

3. వైట్‌హౌస్ విడుదల చేసిన ఫ్యాక్ట్‌షీట్ ప్రకారం ఫలాలు, జ్యూసులు, టీ, కాఫీ, మసాలా దినుసులు, కోకో, నారింజలు, టమాటాలు, బీఫ్ వంటి పలు ఉత్పత్తులపై సుంకాలను తొలగించారు.

4. గతంలో ట్రంప్ ప్రభుత్వం భారత సహా ఇతర దేశాల దిగుమతులపై 25% సుంకాలు, అలాగే రష్యా చమురు కొనుగోళ్లపై అదనంగా మరో 25% పన్ను విధించింది, దీని ప్రభావంతో అమెరికాలో ధరలు పెరిగాయి.

5. ఇటీవల జరిగిన కొన్ని రాష్ట్ర ఎన్నికల్లో “సరసమైన ధరలు” ప్రధాన అంశంగా నిలవడంతో, ధరల పెరుగుదలపై ప్రభుత్వం మీద ప్రజల్లో అసహనం పెరిగింది; సర్వేల్లో 63% ఓటర్లు ట్రంప్ ఆర్థిక నిర్వహణలో విఫలమయ్యారని భావించారు.

6. ట్రంప్ ఈ విమర్శలను కొట్టి పారేస్తూ, బైడెన్ కాలంలో ద్రవ్యోల్బణం భారీగా పెరిగిందని పేర్కొన్నారు. ఇక మామిడి–దానిమ్మ లాంటి భారతీయ ఉత్పత్తుల ఎగుమతుల ప్రాధాన్యాన్ని గుర్తుచేస్తూ, ఇప్పుడు సుంకాల తగ్గింపుతో మరింత ఉపశమనం ఇస్తున్నట్టు తెలిపారు.

అమెరికాలోని డొనాల్డ్ ట్రంప్ ప్రభుత్వం కీలక నిర్ణయాన్ని ప్రకటించింది. దేశంలో పెరుగుతున్నధరలను  నియంత్రించేందుకు, అలాగే రాజకీయ ఒత్తిడిని తగ్గించుకునేందుకు అనేక ఆహార పదార్థాల దిగుమతులపై సుంకాలను తగ్గించబోతోందని తెలిపింది. ఈ చర్యతో భారత్ నుంచి వెళ్లే మామిడి, దానిమ్మ, టీ వంటి వ్యవసాయ ఉత్పత్తుల ఎగుమతులకు లాభం కలిగే అవకాశం ఉంది.

శుక్రవారం వైట్‌హౌస్ విడుదల చేసిన ఫ్యాక్ట్‌షీట్ ప్రకారం, ట్రాపికల్ ఫలాలు, ఫ్రూట్ జ్యూసులు, టీ, కాఫీ, సుగంధ ద్రవ్యాలు, కోకో, నారింజలు, టమాటాలు, బీఫ్ వంటి పలు ఉత్పత్తులపై ఉన్న సుంకాలను తొలగించినట్లు వెల్లడించారు. భారత్‌తో పాటు ఇతర దేశాల దిగుమతులపై ట్రంప్ గతంలో 25 శాతం పన్నులు విధించడమే కాకుండా, రష్యా నుంచి చమురు కొనుగోలు చేస్తున్నందుకు అదనంగా మరో 25 శాతం భారం కూడా పెట్టిన విషయం తెలిసిందే. ఈ భారీ సుంకాల వల్ల అమెరికా మార్కెట్లో కొన్ని ఆహార వస్తువుల ధరలు గణనీయంగా పెరిగిపోయాయి.

ఇటీవల న్యూయార్క్, న్యూజెర్సీ, వర్జీనియా రాష్ట్రాల్లో జరిగిన ఎన్నికల్లో ‘సరసమైన ధరలు’ అనే అంశాన్ని డెమొక్రాట్లు ప్రధాన ఎజెండాగా తీసుకుని ప్రచారం చేయడంతో వారికి అక్కడ మంచి ఫలితాలు వచ్చాయి. పెరుగుతున్న వస్తువుల ధరలు కారణంగా ప్రజలు ఎదుర్కొంటున్న సమస్యలు ప్రభుత్వం మీద అసహనం పెంచాయి. ఎన్‌బీసీ న్యూస్ నిర్వహించిన సర్వేలో కూడా 63 శాతం మంది ఓటర్లు ధరల నియంత్రణతో పాటు ఆర్థిక వ్యవస్థ నిర్వహణలో ట్రంప్ విఫలమయ్యారని అభిప్రాయం వ్యక్తం చేశారు.

అయితే ఈ విమర్శలను ట్రంప్ పూర్తిగా తోసిపుచ్చేశారు. డెమొక్రాట్లు చేస్తున్నది “పూర్తి మోసపూరిత ప్రదర్శన” అని వ్యాఖ్యానిస్తూ, బైడెన్ కాలంలో ద్రవ్యోల్బణం 19.7 శాతం వరకు ఎగబాకిందని గుర్తుచేశారు. ప్రస్తుతం ద్రవ్యోల్బణం 3 శాతం వద్ద నిలిచినా, కొన్ని ముఖ్యమైన ఆహార వస్తువుల ధరలు మాత్రం ఇంకా ఎక్కువగానే ఉన్నాయని సూచించారు.

భారత్–అమెరికా సంబంధాల్లో మామిడి పండ్లు ఎప్పటికీ ప్రత్యేక స్థానాన్ని దక్కించుకున్నాయి. 2006లో అప్పటి అమెరికా అధ్యక్షుడు జార్జ్ డబ్ల్యూ. బుష్ మామిడి దిగుమతులపై ఉన్న నిషేధాన్ని తొలగించగా, తాజాగా ప్రధాని మోదీ అమెరికా పర్యటన సందర్భంగా ట్రంప్–మోదీ సంయుక్త ప్రకటనలో కూడా మామిడి, దానిమ్మ ఎగుమతుల గురించి ప్రత్యేకంగా పేర్కొన్నారు. ద్రవ్యోల్బణాన్ని నియంత్రించేందుకు గతంలో జనరిక్ మందులకు సడలింపులు ఇవ్వగా, ఇప్పుడు ఆహార ఉత్పత్తులపై కూడా సుంకాల తగ్గింపుతో ఉపశమనం కల్పించారు.