సినీ కార్మిక సంఘాలతో సీఎం రేవంత్ రెడ్డి కీలక సమావేశం

• ప్రభుత్వం మరియు సినీ కార్మిక సంఘాల మధ్య విస్తృత చర్చలు.

• వేతన పెంపు, పని దినాల నిర్వహణ, సంక్షేమ పథకాలపై ప్రధానంగా దృష్టి.

• ముఖ్యమంత్రి ఆదేశాలతో త్వరలో ఒక ప్రత్యేక కమిటీ ఏర్పాటు అయ్యే అవకాశం.

• సినీ పరిశ్రమకు ప్రభుత్వ మద్దతు కొనసాగుతుందని ప్రభుత్వం స్పష్టం.

తెలంగాణ సీఎం రేవంత్ రెడ్డి: "సినీ కార్మికుల సంక్షేమానికి ప్రభుత్వం తాము అంకితభావంతో ఉంది"

తెలంగాణ రాష్ట్ర ముఖ్యమంత్రి శ్రీ రేవంత్ రెడ్డి ఇటీవల సినీ పరిశ్రమ కార్మికుల సమస్యలపై స్పందిస్తూ, వారి హక్కులు, అభివృద్ధి, వృత్తిపరమైన భద్రత కోసం రాష్ట్ర ప్రభుత్వం గట్టి కృషి చేస్తుందని స్పష్టం చేశారు.

ఈ నేపథ్యంలో, తెలంగాణ స్టేట్ ఫిల్మ్ డెవలప్‌మెంట్ కార్పొరేషన్ (TSFDC) ఛైర్మన్ దిల్ రాజు అధ్యక్షతన, హైదరాబాద్‌లో నిర్వహించిన ప్రత్యేక సమావేశానికి పలువురు సినీ కార్మిక సంఘాల ప్రతినిధులు హాజరయ్యారు. ఈ సమావేశంలో పరిశ్రమలో కొనసాగుతున్న సమస్యలు, ఉద్యోగుల వేతనాలు, పని పరిస్థితులు, భవిష్యత్తు అవకాశాలు వంటి అంశాలపై విస్తృతంగా చర్చ జరిగింది.

కార్మిక సంఘాల నాయకులు ముఖ్యమంత్రికి తమ సమస్యలను వివరంగా వివరిస్తూ, ఇటీవల ముదిరిన వేతన వివాదాలు, సమ్మెల పట్ల ప్రభుత్వ జోక్యాన్ని కోరారు.

ఈ మేరకు స్పందించిన సీఎం రేవంత్ రెడ్డి మాట్లాడుతూ:

"తెలంగాణ రాష్ట్రం కల్చర్‌లో సినీ పరిశ్రమకు ప్రత్యేక స్థానం ఉంది. సినిమాలు కేవలం వినోదం కాదు – అవి వేలాది కుటుంబాలకు జీవనాధారం. కార్మికుల కష్టాన్ని మేము అర్థం చేసుకుంటున్నాం. వారి సమస్యల పరిష్కారం కోసం ప్రభుత్వం కట్టుబడి ఉంది."

అలాగే ఆయన మాట్లాడుతూ, పరిశ్రమ మొత్తం అభివృద్ధి చెందాలంటే కార్మికులు, నిర్మాతలు, టెక్నీషియన్లు, ఇతర వర్గాల మధ్య సమన్వయం చాలా అవసరం అని తెలిపారు. ఈ దిశగా ప్రభుత్వం మౌలిక సదుపాయాల కల్పన, శిక్షణా కార్యక్రమాలు, మరియు సంక్షేమ పథకాలకు ప్రాధాన్యత ఇస్తుందని హామీ ఇచ్చారు.

దిల్ రాజు కూడా సమావేశంలో మాట్లాడుతూ, ప్రభుత్వ సహకారం వల్ల పరిశ్రమలో శాంతియుత పరిష్కారాలు సాధ్యమయ్యాయని, ముఖ్యమంత్రి హస్తక్షేపంతో తాజా సమ్మె పరిణామాలు సానుకూలంగా పరిష్కారానికి దారితీసినట్టు తెలిపారు.

హైదరాబాద్‌ను అంతర్జాతీయ సినిమా హబ్‌గా తీర్చిదిద్దాలనే లక్ష్యంతో ప్రభుత్వం వ్యూహాత్మకంగా ముందుకెళ్తోందని తెలిపారు.

"తెలంగాణను గ్లోబల్ ఫిల్మ్ డెస్టినేషన్‌గా నిలపాలనే దృక్పథంతో పనిచేస్తున్నాం. పరిశ్రమలో పనిచేస్తున్న కార్మికుల నైపుణ్యాలను మెరుగుపర్చేందుకు ప్రత్యేక శిక్షణా కార్యక్రమాలు ఏర్పాటు చేస్తాం," అని సీఎం పేర్కొన్నారు.

ఈ క్రమంలో, స్కిల్ యూనివర్సిటీ ద్వారా టెక్నీషియన్లు, డిజైన్, ఎడిటింగ్, సౌండ్, లైట్, మేకప్ వంటి విభాగాల్లో శిక్షణలందిస్తామని స్పష్టం చేశారు. పరిశ్రమ అభివృద్ధికి కేవలం సాంకేతిక సదుపాయాలు సరిపోవు — మానవ వనరుల నైపుణ్యాల వృద్ధి కూడా అంతే అవసరమని పేర్కొన్నారు.

"కార్మికులు కూడా తమ నైపుణ్యాలను పెంపొందించుకోవాలి. ఈ శిక్షణ అవకాశాలను సద్వినియోగం చేసుకుంటే పరిశ్రమలో వారికే కాదు, సినిమాకే మేలు జరుగుతుంది," అని సూచించారు.

అలాగే, ఇటీవల చోటుచేసుకున్న కార్మిక సమ్మెల నేపథ్యంలో సీఎం సూచనలు చేశారు:

"సమ్మెల వల్ల పరిశ్రమ మొత్తం నష్టపోతుంది — నిర్మాతలు, కార్మికులు రెండూ ఇబ్బందులు పడతారు. సమస్యలు ఎదురైనా, వాటిని చర్చల ద్వారా పరిష్కరించుకోవడం ఉత్తమ మార్గం. పని వాతావరణాన్ని దెబ్బతీసే చర్యలు వద్దు," అని హెచ్చరించారు.

                   సినీ కార్మికుల కోసం హెల్త్ కవరేజ్, చిన్న నిర్మాతలకు సాయం– సీఎం భరోస..

సినీ కార్మికుల ఆరోగ్య భద్రత కోసం వైద్య బీమా (హెల్త్ ఇన్సూరెన్స్) పథకాలు అమలు చేసే దిశగా చర్యలు తీసుకుంటామని హామీ ఇచ్చారు.

"కార్మికులు ఆరోగ్యంగా ఉంటేనే పరిశ్రమ పటిష్ఠంగా పనిచేస్తుంది. అందుకే వారి ఆరోగ్యాన్ని పరిరక్షించేందుకు ప్రభుత్వం వైద్య బీమా పథకాలు తీసుకురాబోతోంది," అని సీఎం తెలిపారు.

అలాగే, చిన్న స్థాయి నిర్మాతలు ఎదుర్కొంటున్న ఆర్థిక సమస్యలు కూడా ఆయన దృష్టికి వచ్చాయని చెప్పారు. వారి కోసం ప్రత్యేక సహాయ విధానాలను రూపొందించాల్సిన అవసరం ఉందని అభిప్రాయపడ్డారు.

"చిన్న చిత్రాల కోసం రిస్క్ తీసుకునే నిర్మాతలకు ప్రోత్సాహక చర్యలు అవసరం. వారు వెనకబడితే పరిశ్రమలో సృజనాత్మకత తగ్గిపోతుంది. అందుకే వారికి అవసరమైన మద్దతు ఇవ్వాలి," అని సీఎం పేర్కొన్నారు.

సినీ పురస్కారాలపై జాప్యం – కార్మిక నేతల ఆవేదన

సమావేశ సందర్భంలో, సినీ కార్మిక సంఘాల ప్రతినిధులు గత దశాబ్ద కాలంగా తెలంగాణలో సినిమా రంగానికి సంబంధించిన ప్రభుత్వ అవార్డులు ఇవ్వకపోవడం పట్ల అసంతృప్తి వ్యక్తం చేశారు.

"పదేళ్లుగా ఎలాంటి సినిమా పురస్కారాలు ప్రకటించకపోవడం వల్ల సినీ కార్మికులు, కళాకారులు మనోధైర్యం కోల్పోతున్నారు. ప్రభుత్వ ప్రోత్సాహం లభించకపోతే, పరిశ్రమ అభివృద్ధి పడుతుంది," అంటూ వారు ఆవేదన వ్యక్తం చేశారు.

అలాగే, ఇప్పటివరకు ముఖ్యమంత్రి స్థాయిలో సినిమా కార్మికులతో ఈ స్థాయి చర్చలు జరగడం ఇదే మొదటిసారి కావడం పట్ల రేవంత్ రెడ్డికి కృతజ్ఞతలు తెలిపారు.

"సీఎం స్థాయిలో మా సమస్యలను వినడం, ప్రత్యక్షంగా చర్చించడం మాకు కొత్త అనుభవం. ఇది మా ఉత్సాహాన్ని పెంచింది. ముఖ్యమంత్రి గారికి మా ధన్యవాదాలు," అని కార్మిక నేతలు ప్రశంసించారు.