ప్రపంచకప్ విజేత శ్రీచరణికి ఆంధ్రప్రదేశ్ ప్రభుత్వం ఘన సన్మానం

మహిళల వన్డే ప్రపంచకప్‌లో అద్భుత ప్రదర్శనతో భారత జట్టు విజయానికి కీలకంగా నిలిచిన తెలుగుతేజం, క్రికెటర్ శ్రీచరణికు ఆంధ్రప్రదేశ్ ప్రభుత్వం ఘన గౌరవం ప్రకటించింది. ఆమె ప్రతిభకు గుర్తింపుగా ప్రభుత్వం రూ. 2.5 కోట్ల నగదు బహుమతి, గ్రూప్-1 స్థాయి ఉద్యోగం, అలాగే ఆమె స్వస్థలం కడప జిల్లాలో 1,000 చదరపు గజాల ఇల్లు స్థలం కేటాయించనున్నట్లు ప్రకటించింది. ఈ విషయాన్ని ఏపీ సీఎంఓ అధికారిక ట్వీట్ ద్వారా వెల్లడించింది.

అలాగే మంత్రి నారా లోకేశ్ కూడా ఈ విషయంపై ‘ఎక్స్’ వేదికలో ప్రత్యేకంగా స్పందించారు. “శ్రీచరణి యొక్క అచంచల నిబద్ధత, కృషి ఆంధ్రప్రదేశ్‌కు గర్వకారణంగా నిలిచింది. ఆమె అసాధారణ విజయాన్ని గుర్తిస్తూ రాష్ట్ర ప్రభుత్వం గ్రూప్-1 స్థాయి ఉద్యోగం, రూ. 2.5 కోట్ల నగదు బహుమతి, అలాగే కడపలో నివాస స్థలం ఇవ్వాలని నిర్ణయించినందుకు ఆనందంగా ఉంది,” అంటూ మంత్రి లోకేశ్ తన పోస్ట్‌లో పేర్కొన్నారు.

ఇటీవల క్రికెటర్ శ్రీచరణి, మాజీ కెప్టెన్ మిథాలీ రాజ్తో కలిసి సీఎం చంద్రబాబు నాయుడు మరియు మంత్రి నారా లోకేశ్ను వారి నివాసంలో మర్యాదపూర్వకంగా కలిశారు. ఈ సందర్భంలో సీఎం చంద్రబాబు ఆమెను అభినందిస్తూ, ప్రపంచకప్ విజయం ద్వారా దేశానికి గౌరవం తీసుకువచ్చిందని ప్రశంసించారు. మహిళా క్రీడాకారిణులందరికీ శ్రీచరణి ఒక ప్రేరణాత్మక ఆదర్శంగా నిలిచారని ఆయన అన్నారు. అలాగే, ప్రపంచకప్ గెలిచిన ఆనందభరిత క్షణాలను శ్రీచరణి సీఎం, మంత్రితో పంచుకోవడం జరిగింది.

ఈ సందర్భంగా క్రికెటర్ శ్రీచరణి మాట్లాడుతూ, ప్రపంచకప్ విజయం అనంతరం దేశ ప్రజలు, ముఖ్యంగా తెలుగు రాష్ట్రాల అభిమానులు చూపిస్తున్న ప్రేమ, ఆదరణ చూసి ఎంతో ఆనందంగా ఉందని తెలిపారు. తన విజయానికి ప్రధాన కారణం కుటుంబం అందించిన మద్దతు అని చెప్పిన ఆమె, ముఖ్యంగా తన మామ ప్రోత్సాహం లేకపోతే ఈ స్థాయికి చేరుకోలేకపోయేదాన్ని అని గుర్తుచేశారు.

తాను ఆంధ్ర క్రికెట్ అసోసియేషన్ (ACA) ఆధ్వర్యంలో శిక్షణ పొందిన విషయాన్ని శ్రీచరణి పేర్కొన్నారు. ఈ విజయం తన ప్రయాణంలో మొదటి మెట్టు మాత్రమే, ఇంకా ఎన్నో లక్ష్యాలు, ఆశయాలు సాధించాల్సి ఉందని ఆమె స్పష్టం చేశారు. అలాగే, ప్రధాని నరేంద్ర మోదీని కలిసినప్పుడు ఆయన ఇచ్చిన ప్రేరణాత్మక సలహాలు తన భవిష్యత్ ప్రణాళికలకు దిశానిర్దేశం చేశాయని వెల్లడించారు.

ఇదిలా ఉండగా, ఈరోజు సాయంత్రం కడపలో ఏసీఏ మరియు జిల్లా క్రికెట్ అసోసియేషన్ ఆధ్వర్యంలో శ్రీచరణికి ఘనమైన సన్మాన కార్యక్రమం మరియు ర్యాలీ నిర్వహించేందుకు ఏర్పాట్లు జరుగుతున్నాయి.

The Government of Andhra Pradesh, led by Hon’ble Chief Minister Shri N. Chandrababu Naidu Garu has announced a cash award of ₹2.5 crore, a 1,000 sq. yard house site, and a Group-I government job for Ms. Shree Charani in recognition of her exemplary performance in the ICC Women’s… pic.twitter.com/lUHpx1fHy9 — CMO Andhra Pradesh (@AndhraPradeshCM) November 7, 2025